As Xornadas Martín Sarmiento celebránse este ano en Vilafranca e Corullón |
Martes 05 de Marzo de 2019 08:32 |
A Comisión Cultural Martín Sarmiento organiza dende o ano 2005 unhas xornadas para manter viva a memoria da vida e da obra do erudito nacido en Vilafranca do Bierzo un 9 de marzo de 1695. As xornadas contan coa colaboración da secretaría xeral de Política Lingüística da Xunta de Galicia, o que permite consolidar o denominado Día Escolar do Galego no Bierzo que garantiza a interacción desta figura senlleira das Letras Galegas e do seu legado, especialmente o lingüístico, co alumnado e profesorado do Programa de Promoción do Galego na comarca, así como o conxunto das administraciois responsables do mesmo. Un dos últimos logros das Xornadas Martín Sarmiento no referente á dinamización da lingua na comarca foi a elaboración do Decálogo dos novos espazos para o galego no Bierzo que se aprobou por unamidade no Consello Comarcal do Bierzo o 2 de marzo de 2018 co que a promoción lingüística procura novas dimensiois. Seguindo o fío condutor deste acordo institucional, na presente edición das Xornadas inaugurase unha etapa na que as administraciois locais bercianas que falan galego teñan un protagonismo especial. É por iso polo que ademais de realizar actividades en Vilafranca, como a vila natal do erudito homenaxeado, iráse sumando en cada edición a un concello coa idea de desenvolver na localidade escollida un labor específico de promoción da lingua. Este ano será Corullón a localidade que acolla inicialmente o luns día 11 de marzo aos alumnos/as de Secundaria, que abordarán eilí os Intercambios do Día Escolar do Galego no Bierzo. "Temos que agradecer ao goberno municipal a súa disponibilidade que va permitir con toda seguridade ir asentando en cada un dos concellos galegofalantes iniciativas necesarias de dinamización cultural de interese de cara ao futuro", subliñan os organizadores. |